Faton Peci intervistohet nga Prokuroria Speciale për grante bujqësore

Faton Peci, kryetar i Komunës së Mitrovicës së Jugut dhe ish-ministër i Bujqësisë, Pylltarisë dhe Zhvillimit Rural, u paraqit më 30 janar 2026 në Prokurorinë Speciale të Republikës së Kosovës për të dhënë sqarime lidhur me një kallëzim penal të ngritur nga Lidhja Demokratike e Kosovës (LDK) përmes ish-deputetit Paris Guri.

Prokuroria Speciale konfirmoi se intervistimi i Pecit, në cilësinë e të pandehurit, zgjati rreth tre orë dhe ka të bëjë me procesin e ndarjes së granteve në Ministrinë e Bujqësisë.

Në një postim në Facebook, Peci deklaroi se ka qenë “transparent, i qartë dhe i drejtpërdrejtë” në shpjegimet për rolin e tij si ministër në atë proces. Ai cilësoi akuzat si të pabaza dhe paralajmëroi se shumë shpejt do t’i drejtohet organeve të drejtësisë me kallëzim penal kundër Gurit për “kallëzim të rrejhtë penal”, duke e akuzuar atë për orkestrim të një fushate shpifjesh e insinuatash.

Kallëzimi penal i Gurit, i dorëzuar më 19 nëntor, e akuzon Pecin për keqpërdorim të parasë publike, me pretendimin se vëllai dhe daja i kandidates për deputete të Lëvizjes Vetëvendosje, Fitore Pacoli, kishin përfituar grante nga ministria. Peci dhe Pacolli e kanë kundërshtuar këtë, ndërsa Peci ka paditur zyrtarë të LDK-së për deklarime të rreme.

Peci theksoi se sulmet, akuzat e pabaza dhe përpjekjet për baltosjen e emrit të tij nuk do ta ndalin nga angazhimi për “punët e mira dhe punët e mëdha për Kosovën”.