Autoritetet amerikane kanë njoftuar neutralizimin e një kërcënimi terrorist që synonte eventin e arteve marciale të organizuar nga UFC në ambientet e Shtëpisë së Bardhë. Aktiviteti sportiv, i quajtur UFC Freedom 250, ishte pjesë e festimeve për 250-vjetorin e pavarësisë së Shteteve të Bashkuara dhe 80-vjetorin e lindjes së Presidentit Donald Trump.
Sipas drejtorit të FBI, Kash Patel, agjencia mori njoftimin për planin e sulmit më 10 qershor. Dokumentet gjyqësore zbulojnë se hetimet nisën pas një denoncimi të bërë nga nëna e njërit prej të dyshuarve. Plani parashikonte përdorimin e dronëve të pajisur me eksplozivë për të goditur zonën veriore të Shtëpisë së Bardhë gjatë zhvillimit të eventit.
Në operacionin e koordinuar me agjenci të tjera federale, janë vënë në pranga pesë persona, ndërsa tre prej tyre janë akuzuar zyrtarisht për komplot për vrasje. Autoritetet konfirmuan se ndërhyrja shpejtoi neutralizimin e kërcënimit përpara se ai të realizohej, në një aktivitet ku ishin të pranishëm presidenti dhe mijëra shikues. Hetimet për të zbardhur nëse ka pasur një rrjet më të gjerë bashkëpunëtorësh vazhdojnë.