Fenerbahçja ka paraqitur një ofertë zyrtare ndaj Mallorcës për transferimin e sulmuesit kosovar Vedat Muriqi, sipas mediumit turk FotoMac.
Klubi turk ka ofruar 12 milionë euro, ndërsa Mallorca synon 16 milionë euro nga shitja e tij. Dy klubet po negociojnë për të ardhmen e lojtarit, i cili ka shënuar 14 gola këtë edicion në La Liga.
Muriqi, ish-lojtar i Fenerbahçes, ka shprehur dëshirën për të qëndruar te klubi spanjoll. "Jam i lumtur këtu dhe kam një kontratë. Kur një sulmues shënon shumë gola, vijnë oferta. Klubi do të vendosë për të ardhmen time, pastaj unë do të marr vendimin tim", deklaroi ai të shtunën pas tripletës së shënuar ndaj Athletic Bilbaos.
Sulmuesi kosovar ka regjistruar 48 gola në total me Mallorcan dhe ndodhet vetëm 6 gola larg rekordit të Samuel Eto'o-s, golashënuesit më të mirë në histori të klubit me 54 gola. Sipas mediave turke, e ardhmja e Muriqit do të përcaktohet deri në fund të kësaj jave, nëse do të rikthehet në Stamboll apo do të vazhdojë për të thyer rekordin.