Ministri për Evropën dhe Punët e Jashtme, Ferit Hoxha, mori pjesë në Konferencën mbi Mbështetjen e Bashkimit Evropian për Ballkanin Perëndimor, të organizuar nga Gjykata Evropiane e Auditorëve në Luksemburg. Në fjalën e tij, ministri vlerësoi se zgjerimi i Bashkimit Evropian nuk është më një aspiratë, por një domosdoshmëri strategjike për sigurinë, stabilitetin dhe konkurrueshmërinë e kontinentit.
Sipas ministrit Hoxha, anëtarësimi në Bashkimin Evropian mbetet projekti kombëtar i Shqipërisë, i cili shërben si busullë për orientimin e reformave dhe forcimin e institucioneve. Ai vlerësoi se Plani i Rritjes për Ballkanin Perëndimor dhe Mekanizmi për Reforma dhe Rritje janë instrumente kyçe që shpërblejnë rezultatet e arritura dhe forcojnë qeverisjen.
Duke bërë një pasqyrim të ecurisë së vendit, ministri bëri të ditur se Shqipëria ka siguruar 212.8 milionë euro, duke u pozicionuar si përfituesja më e madhe në rajonin e Ballkanit Perëndimor. Kjo arritje, sipas tij, është pasojë e drejtpërdrejtë e zbatimit të reformave.
Në përfundim, ministri bëri thirrje për një lidhje më të qartë dhe më të parashikueshme midis reformave të Planit të Rritjes dhe procesit të anëtarësimit në Bashkimin Evropian. Ai nënvizoi se zgjerimi është përgjegjësi e përbashkët, ku vendet kandidate duhet të vazhdojnë reformat, ndërsa institucionet e Bashkimit Evropian duhet të sigurojnë njohjen dhe shpërblimin e progresit real për të garantuar besimin e ndërsjellë.