Në qytetin e Ferizajt ka filluar sot mbledhja e nënshkrimeve për nismën qytetare që kërkon ndryshimin e trajtimit zyrtar të emrit të këtij vendbanimi. Qëllimi i peticionit, të titulluar "Për një Ferizaj pa Urosevac", është që emri "Ferizaj" të mbetet i vetmi në përdorim për të gjitha dokumentet, tabelat, regjistrat dhe aktet ligjore në nivel shtetëror, në gjuhën shqipe, serbe dhe angleze.
Kryetari i Komunës së Ferizajt, Agim Aliu, i cili ishte i pari që e nënshkroi peticionin, e cilësoi këtë nismë si një akt të drejtësisë historike. Sipas tij, emërtimi "Urosevac" është vendosur nga administrimi i dhunshëm pas vitit 1912, ndërsa qyteti ka mbajtur emrin Ferizaj prej themelimit të tij, 153 vjet më parë. Aliu u bëri thirrje institucioneve qendrore që të formojnë komisione profesionale për të shqyrtuar emërtimet e vendbanimeve dhe për t'i dërguar ato për shqyrtim në Kuvendin e Republikës së Kosovës.
Iniciatori i peticionit, Bashkim Fazliu, theksoi se kërkesa është shprehje e vullnetit demokratik dhe nuk është e drejtuar kundër asnjë komuniteti të caktuar. Ai bëri të ditur se nisma ka marrë mbështetjen e plotë të të gjitha partive politike në komunë, përfshirë ato të komuniteteve joshumicë, duke dëshmuar unitet rreth këtij vendimi.
Përditësime
Lëvizja Vetëvendosje ka zyrtarizuar mbështetjen për nismën e heqjes së emrit 'Urosevac' nga përdorimi zyrtar në Ferizaj. Kryetarja e qendrës së kësaj partie, Fatbardha Zogaj Reka, ka konfirmuar angazhimin e subjektit në këtë proces, duke theksuar se çështja është diskutuar tashmë nga grupi i asamblistëve në Kuvendin Komunal.