Arben Fetoshi, drejtor i Institutit Octopus, ka vlerësuar miratimin nga Kuvendi i Kosovës të dërgimit të Forcës së Sigurisë së Kosovës (FSK) në misionin e Forcës Ndërkombëtare Stabilizuese në Gaza.
Në një postim në Facebook, Fetoshi e cilësoi këtë hap si rreshtim strategjik që shpreh orientimin e qartë euro-atlantik të Kosovës dhe unitetin e forcave politike në rrugën drejt komunitetit euro-atlantik.
Ai theksoi se vendimi dërgon mesazh të fuqishëm ndaj kërcënimeve hibride serbo-ruse dhe tejkalon barrierat që kanë penguar konsolidimin e Kosovës në arenën ndërkombëtare.
Fetoshi vlerësoi se Kosova, si shtet i vogël dhe kompleks nga pikëpamja gjeopolitike, po dëshmon rolin e saj si faktor i rëndësishëm për paqen dhe stabilitetin global. "Jo çdo herë ka rëndësi madhësia, as kapacitetet ushtarake, sepse forca e partneritetit me vlerat e lirisë është më shumë", shkroi ai.
Sipas tij, pjesëmarrja në një nga zonat më të nxehta të botës e afirmon Kosovën si partner të besueshëm përkrah fuqive kryesore ndërkombëtare.
Në fund, Fetoshi theksoi vlerën e partneritetit me aleatët dhe aspiratën e Kosovës për integrim në strukturat euro-atlantike, duke i cilësuar narrativat kundërshtuese si "përralla, ëndrra të këqija ose propagandë".