FIFA ndëshkoi Federatën Spanjolle të Futbollit pas thirrjeve antiislame të një grupi tifozësh gjatë miqësores mes Spanjës dhe Egjiptit, të zhvilluar në mars, në kuadër të përgatitjeve për Kupën e Botës 2026. Sipas BBC-së, Spanja duhet ta zhvillojë miqësoren e radhës me vetëm 15 për qind të kapacitetit të stadiumit të mbyllur, kryesisht në tribunat prapa portave, si dhe të paguajë një gjobë prej 20 mijë dollarësh.
Ndeshja përfundoi 0:0. Gjatë saj, disa tifozë spanjollë brohoritën slogane diskriminuese, përfshirë thirrjen “Kush nuk kërcen është mysliman”. Në ekranet e stadiumit u shfaqën mesazhe kundër diskriminimit, por një pjesë e tifozëve reaguan duke fishkëllyer.
Federata Spanjolle e Futbollit i dënoi publikisht thirrjet. Përzgjedhësi i Spanjës, Luis de la Fuente, i cilësoi ato si “të patolerueshme”. Megjithatë, në mbrojtjen e paraqitur para FIFA-s, federata argumentoi se thirrjet nuk përbënin sjellje diskriminuese. Komiteti disiplinor i FIFA-s e hodhi poshtë këtë pretendim dhe vendosi masat ndëshkuese.
Edhe Federata Egjiptiane e Futbollit i dënoi thirrjet, duke i cilësuar si akt racist të papranueshëm. Ndëshkimi vjen në kuadër të përpjekjeve të futbollit ndërkombëtar për të luftuar racizmin dhe diskriminimin në stadiume.