FIFA pritet të ndryshojë rregullat e pezullimit për kartonët e verdhë në Kupën e Botës 2026, duke futur një amnisti në dy faza. Sipas raportimeve të BBC Sport, kartonët e verdhë do të fshihen pas përfundimit të fazës së grupeve dhe pas çerekfinaleve. Çështja diskutohet sot në mbledhjen e Këshillit të FIFA-s në Vankuver.
Turneu me 48 ekipe zhvillohet nga 11 qershori deri më 19 korrik 2026 në Shtetet e Bashkuara, Kanada dhe Meksikë. Zgjerimi sjell një fazë të re eliminimi, atë të 1/16-tës, dhe rrit numrin e ndeshjeve në tetë për të arritur finalen. Kjo rrit rrezikun e pezullimeve për akumulim kartonësh.
Aktualisht, një lojtar pezullohet për një ndeshje pas dy kartonëve të verdhë. FIFA kishte futur më parë amnisti pas çerekfinaleve për të shmangur raste si ai i Michael Ballack, kapiten i Gjermanisë, i cili humbi finalen e 2002-s pas kartonit të dytë në gjysmëfinale.
Amnistia e re parashikon:
- Fshirje pas fazës së grupeve për kartonët që nuk kanë sjellë pezullim;
- Fshirje e dytë pas çerekfinaleve për lojtarët me një karton në fazat 1/16, 1/8 dhe çerekfinale.
Ky ndryshim synon të ulë mundësinë që lojtarë kyç të mungojnë në gjysmëfinale ose finale për shkak të akumulimit të kartonëve.