Klubi italian i Fiorentinës ka shfaqur interes serioz për shërbimet e futbollistit të Kosovës, Edon Zhegrova. Pas një sezoni të parë në Serie A me Juventusin, ku 27-vjeçari nuk arriti të përmbushë pritshmëritë, mundësia e largimit të tij është bërë mjaft e përfolur.
Sipas raportimeve nga La Nazione dhe CalcioMercato.it, drejtuesit e Fiorentinës po vlerësojnë kushtet financiare të lojtarit si të përballueshme. Zhegrova, i cili zotëron edhe shtetësinë shqiptare, përfiton një pagë neto prej 2.5 milionë euro në sezon, shifër që vlerësohet e pranueshme nga klubi nga Firence.
Nga ana tjetër, për Juventusin, largimi i mundshëm i Zhegrovës shihet si një mundësi për të riformuar repartin ofensiv, duke pasur parasysh se lojtari nuk u përshtat plotësisht me skemat e ekipit pas transferimit nga Lille vitin e kaluar për një vlerë prej afro 15 milionë euro. Kontrata aktuale e lojtarit me bardhezinjtë është e vlefshme deri në vitin 2030. Pritet që në ditët në vijim të ketë kontakte më konkrete ndërmjet klubeve për të testuar mundësinë e një transferimi zyrtar.
Përditësime
Burime pranë lojtarit konfirmojnë se Edon Zhegrova po vlerëson opsione të reja për karrierën pas një sezoni sfidues në Serie A. Performanca e tij u ndikua nga një lëndim serioz dhe konkurrenca e lartë te Juventusi, ku regjistroi 19 paraqitje pa realizuar gol apo asistim. Përtej interesimit të Fiorentinës, për shërbimet e tij janë shfaqur edhe disa klube turke.