Drejtoresha e Përgjithshme e Burgjeve, Sadleva Bodo, ka firmosur urdhrin për transferimin e Ergys Agasit nga paraburgimi i Bradasheshit, ku ai mbahet që prej arrestimit. Më 29 tetor, forcat e Drejtorisë së Përgjithshme të Burgjeve shkuan në institucion për të kryer procedurat e transferimit. Autoritetet nuk kanë bërë të ditur se ku do të dërgohet Agasi, duke e mbajtur destinacionin sekret për arsye sigurie.
Java News raporton se Agasi pritet të transferohet në Fier. Burimet e tjera thonë se institucioni ku do të dërgohet nuk është bërë i ditur. Një ditë më parë, kryetari i Bashkisë së Tiranës, Erion Veliaj, u transferua nga burgu i Durrësit në atë të Fierit.
Agasi u arrestua më 26 gusht 2026 në zonën e Plepave, në hyrje të qytetit të Durrësit, pas disa muajsh në kërkim. Sipas SPAK-ut, ndaj tij ishte caktuar masa e sigurisë “arrest në burg” me vendim të Gjykatës së Posaçme, më 15 dhjetor 2025. Në momentin e arrestimit, ai shoqërohej nga ish-punonjësi i policisë Ulian Shpataraku, i cili u arrestua në flagrancë nën dyshimin për veprën penale të përkrahjes së autorit të krimit.
SPAK-u po heton Agasin në kuadër të një procedimi penal të regjistruar në vitin 2025, që lidhet edhe me prokurimet publike të Agjencisë Kombëtare të Shoqërisë së Informacionit (AKSHI). Dyshimet ndaj tij përfshijnë konkurrencë të paligjshme nëpërmjet dhunës, heqje të paligjshme të lirisë, shkelje të barazisë në tendera publikë, korrupsion aktiv, pastrim të produkteve të veprës penale dhe përfshirje në grup të strukturuar kriminal. Këto janë dyshime që po hetohen.