Pas përfundimit të një edicioni mbresëlënës në Bundesligë, sulmuesi 23-vjeçar Fisnik Asllani është kthyer në një nga emrat më të kërkuar në tregun e transferimeve. Në sezonin 2025/2026, ai regjistroi 10 gola dhe 9 asistime në 33 paraqitje.
Sipas raportimeve të gazetës gjermane Bild, klubi i RB Leipzig ka ndërmarrë hapat e parë për të siguruar shërbimet e futbollistit, duke zhvilluar kontaktet e para me përfaqësuesit e tij. Megjithatë, bisedimet janë ende në fazën fillestare dhe nuk ka një marrëveshje konkrete. Për më tepër, brenda radhëve të RB Leipzig thuhet se ka hezitime për shkak të numrit të lartë të sulmuesve që klubi ka aktualisht në dispozicion.
Fisnik Asllani është nën kontratë me Hoffenheim deri në vitin 2029, por një klauzolë lirimi prej 30 milionë eurosh e bën atë një objektiv të realizueshëm për skuadrat elitare. Përveç RB Leipzig, interesim të vazhdueshëm për lojtarin ka shfaqur edhe Borussia Dortmund, ndërsa së fundmi raportohet për kontakte edhe nga ana e FC Barcelona, me kërkesë të trajnerit Hansi Flick.