Sekretari i Përgjithshëm i Partisë Demokratike, Flamur Noka, ka shprehur qëndrimin e opozitës kundër protestës për zonën e Zvërnecit. Në deklaratën e tij, Noka i ka cilësuar protestuesit si përfaqësues të interesave të rrjetit të Soros, duke pretenduar se qëllimi i tyre është goditja e figurës së presidentit Donald Trump dhe dhëndrit të tij, Jared Kushner.
Sipas Nokës, shqetësimet për mbrojtjen e flamingove dhe faunës në Zvërnec nuk janë të sinqerta. Ai argumentoi se ndërsa protestohet për këtë çështje, Aeroporti i Vlorës po shkakton dëme të vazhdueshme në ekosistem, pa shkaktuar reagimin e organizatave si Europeangreens apo Soros Albania.
Në vijim, Noka pohoi se pas organizimit qëndron kryeministri Edi Rama, duke përmendur si provë përfshirjen e bashkëshortit të një ministres në radhët e organizatorëve. Ai kritikoi gjithashtu Komitetin Shqiptar të Helsinkit, duke e akuzuar për selektivitet në raportimin e shkeljeve të të drejtave të njeriut gjatë 13 viteve të fundit. Në këtë kontekst, ai përmendi rastet e Ardit Gjoklajt, Klodian Rashës dhe ish-Presidentit të Republikës, për të cilat, sipas tij, institucioni në fjalë nuk reagoi.