Arbitri shqiptar Florian Lata është përzgjedhur për të drejtuar finalen e Kampionatit Europian U-17 "Estoni 2026". Përballja mes Belgjikës dhe Italisë është planifikuar të zhvillohet më 7 qershor, në orën 19:00, në stadiumin Lilleküla në Talin.
Në ekipin e arbitrimit, përkrah Florian Latës, do të jetë asistenti shqiptar Mario Shazivari. Pjesë e ekipit të gjyqtarëve do të jenë gjithashtu:
- Nikola Borovic (Serbi), asistent i dytë
- Thomas Gary Owen (Uells), arbitër i katërt
Ky emërim vjen pas paraqitjeve të vlerësuara të Latës gjatë turneut final në Estoni. Ai drejtoi ndeshjen hapëse të turneut ndërmjet Estonisë dhe Kroacisë më 28 maj, si dhe takimin midis Francës dhe Malit të Zi më 1 qershor.
Federata e Futbollit e Shqipërisë ka përgëzuar Florian Latën dhe Mario Shazivarin për këtë arritje, e cila konsiderohet një dëshmi e rritjes së nivelit të arbitrimit shqiptar në arenën ndërkombëtare. Ndeshja finale do të transmetohet për publikun shqiptar përmes FSHF TV.