Fundjava e parë e muajit korrik ka sjellë një fluks të lartë hyrjesh në Pikën e Kalimit Kufitar të Morinës, pasi mijëra qytetarë nga Kosova kanë zgjedhur bregdetin dhe zonat turistike të Shqipërisë për pushime. Sipas të dhënave zyrtare të Drejtorisë së Kufirit dhe Migracionit, në harkun kohor midis orës 05:00 dhe 09:00, kanë hyrë në territorin shqiptar 11,725 shtetas me 2,740 automjete.
Për të përballuar fluksin, autoritetet kanë vënë në funksion të gjitha sportelet e kontrollit. Për automjetet me targa të Kosovës po zbatohet procedura e kalimit të lehtësuar në bazë të marrëveshjeve në fuqi, ndërkohë që për automjetet me targa të huaja po ndiqen procedura të përshpejtuara për të shmangur vonesat.
Situata e trafikut është ndërlikuar edhe nga dy aksidente të njëpasnjëshme të ndodhura në Vërmicë, afër Prizrenit. Në këto ngjarje rrugore janë përfshirë gjithsej gjashtë automjete, ndërsa si pasojë e përplasjeve kanë pësuar lëndime shtatë persona.
Përditësime
Gjatë 36 orëve të fundit, pika kufitare e Morinës ka shënuar fluks të lartë të pushuesve që udhëtojnë nga Kosova drejt Shqipërisë. Policia e Shtetit njoftoi hyrjen e rreth 30 mijë udhëtarëve dhe kalimin e 136 autobusëve përmes këtij aksi.