Shorti i Ligës së Kombeve e vendosi kombëtaren e Kosovës në Ligën B, grupin e tretë, përballë Austrisë, Republikës së Irlandës dhe Izraelit.
Trajnerin Franco Foda e mbushin ndjenja të përziera për sfidën me Austrinë, skuadër që ai e drejtoi nga nëntori 2017 deri në mars 2022. Gjatë kësaj periudhe zhvilloi 48 ndeshje ndërkombëtare me 27 fitore, 6 barazime dhe 15 humbje. Kulmi ishte kualifikimi në fazën e 1/8 të EURO 2020, ku Austria u eliminua nga Italia pas kohës shtesë.
"Austria nuk ishte zgjedhja ime e parë; ata kanë cilësi të jashtëzakonshme. Nga ana tjetër, mezi pres t’i shoh sërish ish-lojtarët e mi", tha Foda në intervistë për Sky Austria.
Ndeshja e parë zhvillohet në Vjenë më 27 shtator, ndërsa kthyeseja në Kosovë parashikohet për 4 tetor. Stadiumi në Vjenë ende nuk është përcaktuar.
Foda theksoi praninë e madhe të tifozëve kosovarë: "Kjo do të jetë ndeshje në shtëpi për ne, sepse jemi të sigurt se 10 000 ose 15 000 kosovarë do të na mbështesin në Vjenë".
Ndeshjet e Kosovës në kualifikueset për Kupën e Botës fillojnë ndaj Sllovakisë, pastaj ndaj fituesit të çiftit Turqi-Rumani në stadiumin Fadil Vokrri.