Kombëtarja e Kosovës do të përballet më 26 mars me Sllovakinë në gjysmëfinalen e plejofit kualifikues për Kupën e Botës 2026, në Stadiumin Nacional në Bratislavë.
Përzgjedhësi Franco Foda foli për këtë ndeshje në intervistën e dhënë për gazetën austriake Kronen Zeitung. Ai shpjegoi se ai dhe ndihmëstrajnerët kanë udhëtuar gjatë muajve të fundit për të vëzhguar lojtarët.
"Kur arrin deri këtu, natyrshëm dëshiron të bësh hapin tjetër. Javën tjetër do të përballemi me Sllovakinë në udhëtim. Nëse kualifikohemi më tej, do të kemi një ndeshje në shtëpi kundër fituesit të duelit Turqi – Rumani", tha 59-vjeçari.
Foda e vlerësoi kundërshtarin si të fortë në shtëpi, duke përmendur fitoren e tyre ndaj Gjermanisë. Megjithatë, ai theksoi përmirësimin e skuadrës kosovare.
"Tani kemi më shumë lojtarë cilësorë në skuadër. Opsionet, mundësitë dhe cilësia janë rritur me ardhjen e Fisnik Asllanit, Leon Avdullahut dhe Albion Hajdarit të Hoffenheimit, të cilët vendosën të luajnë për Kosovën. Ne kemi fituar tashmë jashtë vendit kundër Suedisë, Sllovenisë dhe Islandës. Kështu që kemi shumë besim. Do të thosha gjasat janë 50 me 50", deklaroi ai.
Trajneri gjerman foli edhe për euforinë në futbollin kosovar dhe mbështetjen e tifozëve. "Rrugës për në redaksinë tuaj, dy kosovarë që jetojnë në Graz më ndalën në rrugë dhe më uruan suksese. Kjo tregon se të gjithë janë në ankth. Është e jashtëzakonshme sa shumë tifozë udhëtojnë me ne. Ndihemi si në shtëpi kudo. Në Suedi gjysma e stadiumit ishte me kosovarë. Kjo i jep ekipit energji të madhe", u shpreh Foda.