Forcat ruse sulmuan zonën banimi të Kostyantynivkës në rajonin e Donteskut duke përdorur municion fosforik, pas së cilës ndodhi goditja me bombën ajrore FAB-1500, me peshë 1.500 kilogramë.
Rreth sulmit raportoi Brigada e 28-të e Mekanizuar e Forcave të Armatosura të Ukrainës, e cila publikoi një video të ngjarjes, shkruan Euromaidan Press. Videoja u regjistrua nga operatorët e dronëve të njësisë R.V. të Batalionit të 3-të Mekanizuar. Në të shihet bombardimi me municion fosforik mbi pjesën banimi të qytetit, i ndjekur menjëherë nga goditja me bombën FAB-1500.
Brigada shkroi: “Kostyantynivka. Realiteti i qytetit që rusët po e fshijnë nga faqja e dheut”. Ajo shtoi: “Pilotët tanë nga njësia R.V. e Batalionit të 3-të Mekanizuar regjistruan sulmet ruse me fosfor mbi një lagje banimi. Bëhet fjalë për armë të ndaluar që djegin çdo gjallesë. Menjëherë pas kësaj ndodhi goditja me bombën FAB-1500”.
Municioni fosforik përmban një përzierje djegëse që digjet në temperatura mbi 800 gradë Celsius dhe përhapet në një sipërfaqe prej disa qindra metrash katrorë. Plagët e shkaktuara nga kjo armë mund të jenë të rënda dhe të dhimbshme, ose të çojnë në vdekje të ngadaltë. Përdorimi i tij kundër civilëve është i ndaluar sipas Protokollit III të Konventës për Armët Konvencionale të Caktuara.