Komisioni për Legjislacion, Mandate, Imunitete, Rregulloren e Kuvendit dhe Mbikëqyrjen e Agjencisë Kundër Korrupsionit ka formuar me të gjitha votat për grupin punues prej pesë anëtarësh për shqyrtimin e aplikacioneve për anëtarë të Këshillit Gjyqësor të Kosovës (KGJK).
Kryesuesja e grupit është Blerta Deliu-Kodra, ndërsa anëtarët e tjerë janë Vigan Qorroli nga LVV, Besnik Tahiri nga AAK, Erxhan Galushi nga komunitetet dhe Ljiljana Stefanovic nga Lista Serbe.
Kryetari i komisionit, Përparim Gruda, shpjegoi se janë 23 aplikantë në total, prej të cilëve 19 shqiptarë dhe 4 serbë. Ai theksoi se kushtet për formimin e grupit janë plotësuar.
Grupi punues do të shqyrtrojë dosjet e kandidatëve. Pas përfundimit të punës, kryesuesja do ta njoftojë komisionin me gjetjet për të dakordësuar datën dhe kriteret e intervistave.
Pozitat e lira për plotësimin e KGJK-së janë tre:
- Një anëtar nga radhët e jogjyqtarëve të komunitetit shqiptar, sipas nenit 108, paragrafi 6, nënparagrafi 2 të Kushtetutës së Republikës së Kosovës (amendamenti 25).
- Dy anëtarë nga komuniteti serb, sipas nenit 108, paragrafi 6, nënparagrafi 3 të Kushtetutës, ku të paktën njëri duhet të jetë gjyqtar.
Gruda kërkoi që dosjet të ruhen nga anëtarët, pasi administrata nuk mund të prodhojë kopje të tjera për shkak të volumit të madh.