Presidenti francez Emmanuel Macron dhe Sulltani i Omanit, Haitham bin Tariq, zhvilluan një takim në Pallatin Elysee për të diskutuar mbi uljen e tensioneve në Lindjen e Mesme dhe sigurinë detare. Në fokus të bisedimeve ishte çminimi i Ngushticës së Hormuzit, nyjë strategjike për transportin ndërkombëtar të naftës dhe gazit.
Përmes një postimi në platformën X, presidenti Macron deklaroi se qëllimi i kësaj nisme është sigurimi i korridoreve detare dhe garantimi i kalimit të lirë e të pakushtëzuar në rajon. Ky vendim vjen si pasojë e shqetësimeve të shtuara për sigurinë gjatë muajve të fundit.
Detaje nga ceremonia
Gjatë takimit zyrtar, presidenti Macron u shfaq me syze dielli. Sipas bashkëpunëtorëve të tij, kjo ishte një masë e përkohshme pasi presidenti po përballet sërish me një problem shëndetësor në sy, çka e detyroi atë t'i mbante syzet edhe gjatë ceremonisë së nënshkrimit të marrëveshjeve dypalëshe.