Vala e të nxehtit që ka përfshirë Francën ka shkaktuar vdekjen e të paktën 55 personave, të cilët humbën jetën teksa përpiqeshin të freskoheshin. Lajmin e bëri të ditur ministrja e Sportit, Marina Ferrari, për transmetuesin Franceinfo.
Sipas Meteo-France, temperaturat pritet të lëvizin nga 36 deri në 41 gradë Celsius. Përballë kësaj situate, 61 departamente ndodhen nën alarm të kuq, ndërsa 25 të tjera janë në alarm portokalli. Autoritetet parashikojnë një lehtësim të pjesshëm të situatës, ku 11 departamente pritet të kalojnë në nivelin portokalli të premten në mbrëmje, ndërsa 13 të tjera do të hiqen nga lista e alarmit të kuq të shtunën në mëngjes.
Sistemi shëndetësor po përballet me presion të lartë. Ministrja e Shëndetësisë, Stephanie Rist, paralajmëroi se spitalet mund të kenë vështirësi për shkak të shtimit të vizitave në urgjenca. Prefekti i Policisë së Parisit, Patrice Faure, konfirmoi se spitalet në kryeqytet dhe rrethinat janë aktualisht të mbingarkuara.
Si masë parandaluese, kryeministri Sebastien Lecornu ka aktivizuar planin ORSAN të nivelit të tretë, i cili përfaqëson mobilizimin maksimal të kujdesit shëndetësor. Gjithashtu, autoritetet e Parisit kanë ndaluar konsumimin e alkoolit në hapësirat publike duke filluar nga mesdita e së premtes.