Qeveria franceze po përshpejton shqyrtimin e projektligjit “Vandalët paguajnë”, i cili parashikon që protestuesit të mbajnë përgjegjësi financiare për dëmet e shkaktuara gjatë demonstratave, edhe kur nuk i kanë shkaktuar vetë. Senati francez pritet ta diskutojë nismën këtë javë. Gjobat mund të arrijnë deri në 10 mijë euro.
Sipas projektligjit, një protestues mund të ngarkohet me pagesën e dëmeve nëse vazhdon të protestojë pranë vendit ku kanë ndodhur incidentet ose merr pjesë në të njëjtin grup me personat që i kanë shkaktuar ato. Nisma parashikon gjithashtu zgjerimin e përdorimit të dronëve për mbikëqyrjen e protestave.
Emmanuel Macron po përballet me kritika nga sindikatat dhe organizatat për të drejtat e njeriut, të cilat thonë se masa mund të cenojë të drejtën për të protestuar. Përfaqësues të së majtës dhe sindikatat paralajmërojnë se qytetarët mund të heqin dorë nga protestat paqësore, nga frika se do të mbajnë përgjegjësi për dëme të shkaktuara nga të tjerë. Kryeministri Sébastien Lecornu e ka quajtur nismën “absolutisht të domosdoshme” dhe ka thënë se ajo do të ndihmojë në luftimin e vandalizmit dhe mbrojtjen e pronës publike e private.
Protestat dhe masat e sigurisë
Në Francë po zhvillohen protesta prej më shumë se një muaji. Nxënësit e shkollave të mesme kanë bllokuar institucione arsimore, duke kërkuar zgjidhje për mungesën e mësuesve, riparimin e ndërtesave shkollore të amortizuara dhe ndryshime në platformën e aplikimeve universitare. Protestave u janë bashkuar sindikatat dhe përfaqësues të lëvizjes së “Jelekëve të Verdhë”. Pakënaqësitë lidhen edhe me rritjen e kostos së jetesës dhe funksionimin e shërbimeve publike.
Pas përplasjeve të dhunshme në fillim të muajit, autoritetet kanë shtuar masat e sigurisë dhe kanë vendosur kufizime për protestat. Demonstratat, kryesisht paqësore, u shoqëruan me plaçkitje, zjarre dhe akte vandalizmi ndaj ndërtesave publike. Sipas raportimeve, autoritetet kanë ndaluar grumbullimet pranë shkollave dhe protestat në qendrat e qyteteve, si dhe kanë vendosur shtetrrethime në disa zona. Një raportim i Java News përmend gjithashtu periudha të zgjatura të ndalimit policor për personat e arrestuar.
Projektligji u hartua fillimisht pas përplasjeve të dhunshme që pasuan fitoren e Paris Saint-Germain ndaj Arsenalit në finalen e Ligës së Kampionëve, në maj. Debati zhvillohet përpara zgjedhjeve presidenciale të vitit 2027. Marine Le Pen, drejtuese e partisë Tubimi Kombëtar, po përpiqet të forcojë profilin e saj si mbështetëse e rendit dhe e policisë.