Franca po përballet me një valë të nxehti me intensitet të pazakontë, e cila ka shkaktuar ndërprerje të gjera të energjisë elektrike. Rreth 68,000 familje në departamentin e Finistère, në rajonin e Bretanjës, mbetën pa energji elektrike këtë të mërkurë. Sipas autoriteteve lokale, defekti ka qenë aksidental dhe i lidhur drejtpërdrejt me temperaturat e larta që kanë dëmtuar një transformator.
Rekorde meteorologjike
Sipas Meteo France, vendi ka shënuar rekorde historike të temperaturave që nga fillimi i matjeve:
- Temperatura mesatare kombëtare prej 29.8°C, e regjistruar të martën, është dita më e nxehtë e shënuar ndonjëherë.
- Nata mes së hënës dhe së martës rezultoi nata më e nxehtë, me një mesatare prej 29.9°C.
- Në qytetin Pissos, në rajonin Landes, termometri arriti në 44.3°C.
Situata në vend
Aktualisht, 58 departamente franceze janë nën alarm të kuq, ndërsa 31 të tjera janë nën alarm portokalli. Autoritetet kanë ngritur njësi të krizës për të menaxhuar situatën, ndërsa operatorët RTE dhe Enedis po punojnë për rikthimin e furnizimit.
Për shkak të kushteve ekstreme, janë raportuar të paktën 40 viktima gjatë ditëve të fundit, kryesisht si pasojë e mbytjeve në zona të pambikëqyrura. Vala e të nxehtit pritet të vijojë, duke prekur edhe vende të tjera të Evropës Perëndimore, si Holanda dhe Mbretëria e Bashkuar, si dhe shtete të Evropës Qendrore dhe Lindore.