Federata Shqiptare e Futbollit (FSHF) ka ndërtuar një mini-fushë futbolli në kujtim të Martin Cani, nxënës 14-vjeçar që humbi jetën tragjikisht në nëntor 2024 pranë shkollës 'Fan Noli'. Ai u vra me thikë nga një bashkëmoshatar.
Mini-fusha mban emrin 'Në kujtim të Martinit', siç shkruhet në pllakën emërtuese. Ajo shërben si homazh për talentin e ri të futbollit shqiptar dhe si hapësirë për fëmijët e zonës, ku ata mund të luajnë dhe të edukohen përmes sportit.
Në ceremoninë e inaugurimit të 23 prillit 2026 ishin të pranishëm Anila Basha, anëtare e Komitetit Ekzekutiv të FSHF-së, si dhe familjarët e Martin Cani. Anila Basha deklaroi: «Sot inaugurojmë një fushë që do të mbajë emrin e Martinit – një djalë i talentuar dhe me potencial të madh. Ky është një kontribut i Federatës jo vetëm për të nderuar kujtimin e tij, por edhe për të inkurajuar fëmijët që të zgjedhin sportin si rrugë zhvillimi. Në këtë mënyrë japim edhe një mesazh të qartë: dhuna nuk është zgjidhje, ndërsa sporti është një alternativë që ndërton dhe bashkon».
Nëna Florina Cani u shpreh: «Jam shumë krenare që u realizua kjo mini-fushë për të gjithë fëmijët. Shpresoj që këtu të përcillet gjithmonë energjia pozitive që kishte Martini. Faleminderit nga zemra Federatës».
Babai Angel Cani shtoi: «Faleminderit FSHF-së që nuk e harroi Martinin dhe që krijoi këtë hapësirë për komunitetin dhe brezat e rinj. Është një kontribut i çmuar për të ardhmen e fëmijëve».
Më parë, në nëntor 2025, në një fushë sportive u vendos një pllakë metalike përkujtimore me portretin e Martin Cani të realizuar me lazer.