Komisioni i Disiplinës dhe Etikës pranë Federatës Shqiptare të Futbollit ka rrëzuar kërkesën e KF Tirana për të konvertuar masën disiplinore të ndeshjes pa spektatorë në gjobë financiare. Ky vendim e bën të detyrueshme zhvillimin e ndeshjes së javës së 5-të të Abissnet Superiore midis KF Tirana dhe AF Elbasani pa praninë e tifozëve në stadiumin Selman Stërmasi.
Sipas njoftimit zyrtar, Komisioni e mori vendimin pas shqyrtimit të kërkesës së paraqitur më 18 shtator 2026 nga klubi bardheblu. Në vendim citohet komunikimi zyrtar me Drejtorenë Vendore të Policisë Tiranë, e cila bëri të ditur se, për shkak të kohës së kufizuar nga momenti i njoftimit për ndeshjen, ka qenë objektivisht e pamundur planifikimi dhe marrja e masave të nevojshme për garantimin e sigurisë dhe mbarëvajtjen e takimit.
Komisioni vlerësoi se, në këto rrethana, nuk ishte e përshtatshme konvertimi i masës disiplinore të vendosur më 11 maj 2026 përmes vendimit nr. 45. Në përputhje me Kodin e Disiplinës dhe Etikës, vendimi është përfundimtar dhe i paapelueshëm.
Nga ana tjetër, KF Tirana ka reaguar duke konfirmuar se kishte përmbushur të gjitha kushtet rregullatore për konvertimin e dënimit, përfshirë shlyerjen e detyrimeve financiare. Klubi thekson se është duke ndjekur procedurat institucionale dhe po komunikon me organet përkatëse të FSHF për të paraqitur argumente të mëtejshme juridike, me shpresën për një rishqyrtim të çështjes.