Federata Shqiptare e Futbollit (FSHF) ka uruar të gjithë shqiptarët e Kosovës, kudo që jetojnë e veprojnë, për festën e 18-vjetorit të Pavarësisë, më 17 shkurt 2026.
Në urim thuhet se gjatë këtyre 18 viteve, Kosova ka përjetuar zhvillim të dukshëm në shumë fusha. Sporti, dhe në veçanti futbolli, ka luajtur rol të rëndësishëm në përfaqësimin dhe promovimin e saj në arenën ndërkombëtare.
FSHF vlerëson në mënyrë të veçantë bashkëpunimin e ngushtë dhe marrëdhëniet vëllazërore me Federatën e Futbollit të Kosovës (FFK). Këto marrëdhënie janë ndërtuar mbi respekt të ndërsjellë, solidaritet dhe synime të përbashkëta për zhvillimin dhe promovimin e futbollit.
Në këtë përvjetor të rëndësishëm, FSHF shpreh bindjen se bashkëpunimi mes dy federatave do të vijojë të forcohet edhe më tej, në shërbim të brezave të rinj dhe të sukseseve të reja sportive.
Urimi përfundon me fjalët: "Gëzuar 18-vjetorin e Pavarësisë Kosovë!".