Forca e Sigurisë së Kosovës po i afrohet fazës përfundimtare të transformimit në ushtri me kapacitete të plota. Një boshllëk thelbësor vazhdon të mbetet mungesa e një spitali ushtarak.
Dy vjet para përmbylljes së procesit, pjesëtarët e FSK-së detyrohen të kërkojnë trajtim jashtë strukturave ushtarake për raste më serioze shëndetësore. Ndihma e parë dhe shërbimet bazike ofrohen brenda kazermave, ndërsa Qendra e Mjekësisë në Kazermën “Adem Jashari” në Prishtinë mbetet struktura më e avancuar mjekësore brenda forcës.
Transformimi i FSK-së në ushtri, i nisur në vitin 2018, parasheh që deri në vitin 2028 kjo forcë të ketë mbi 7.500 pjesëtarë, përfshirë 5.000 trupa aktive – një objektiv që, sipas Ministrisë së Mbrojtjes, tashmë është arritur. Ky transformim përfshin rritjen e numrit të ushtarëve dhe ngritjen e kapaciteteve të reja operative. Ministri në detyrë i Mbrojtjes Ejup Maqedonci ka deklaruar se FSK-ja zhvillon kapacitete mjekësore sipas modelit të sistemit mjekësor ushtarak amerikan.