Ministria e Mbrojtjes dhe Forca e Sigurisë së Kosovës (FSK) janë në proces të trajnimit të formës dhe kapacitetit për të kontribuar në Forcën Ndërkombëtare Stabilizuese për Gazën, deklaroi ministri në detyrë i Mbrojtjes, Ejup Maqedonci, për Radion Evropa e Lirë.
Autoritetet kosovare kanë bërë të ditur se FSK-ja do të jetë pjesë e kësaj force, e cila buron nga plani 20-pikësh i presidentit amerikan Donald Trump për paqe në territorin palestinez. Kryeministri në detyrë Albin Kurti deklaroi më 30 janar se pjesëmarrja vjen pas konferencës në Dohën e Katarit në dhjetorin e vitit të kaluar, të organizuar nga Komanda Qendrore e Shteteve të Bashkuara.
I pyetur për rezultatet e takimit, Maqedonci theksoi se konferenca kishte karakter informues për forcën stabilizuese dhe se Kosova u ftua nga ushtria amerikane. “Në këtë fazë nuk është kërkuar të jepen zotime”, tha ai.
Pas ftesës nga SHBA-ja, Kurti miratoi kërkesën që komandanti i FSK-së, Bashkim Jashari, të merrte pjesë në samitin përgatitor në Katar. “Në kuadër të gatishmërisë sonë për të kontribuar brenda kapaciteteve tona për paqe dhe stabilitet në Gaza, kryeministri Kurti ka miratuar kërkesën e Ministrisë së Mbrojtjes për pjesëmarrjen e Komandantit të FSK-së në Samitin përgatitor për krijimin e Forcës Ndërkombëtare Stabilizuese për Gazën, që buron nga Plani Gjithëpërfshirës për Përfundimin e Konfliktit në Gaza”, deklaroi zëdhënësi i Kurtit, Përparim Kryeziu, për Radion Evropa e Lirë.
Kosova ka zotuar kontribut për paqe në botë. Presidentja Vjosa Osmani është bërë pjesë e Bordit të Paqes, nismë e Trump-it për zgjidhjen e konflikteve globale.