Trajneri i Romës, Gian Piero Gasperini, foli në konferencën për shtyp një ditë para ndeshjes së Serie A me Juventusin, të parashikuar për së dielën. Ai njoftoi se gjendja e Paulo Dybala mbetet e pasigurt, pavarësisht përmirësimit të saj. "Sot do të kuptojmë nëse Dybala do të mund të luajë apo jo, është shumë më mirë, por nuk është ende në kushtet për të luajtur", tha Gasperini.
Sa i përket Soule-s, trajneri konfirmoi se ai nuk do të jetë i gatshëm këtë javë, por shprehu shpresë për kthimin e tij javën e ardhshme.
Gasperini e cilësoi sfidën me Juventusin si përballje me të kaluarën e tij. Ai kaloi 10 vjet si lojtar i ri, 10 vjet si trajner i të rinjve dhe 5 vjet si trajner i skuadrës Primavera te klubi bardhezi. "Juventusi për mua ka qenë një palestër e jashtëzakonshme, ku futbolli luhej mirë dhe më dha mundësinë për të udhëtuar në Evropë", u shpreh ai.
Trajneri trajtoi edhe vështirësitë e futbollit italian në kompeticionet evropiane dhe kombëtare. "Duhet të pranojmë realitetin, nuk ka vetëm një problem. Ndoshta është edhe meritë e vendeve të tjera, si Norvegjia", tha Gasperini, duke shtuar se ndonjëherë meritat u jepen të tjerëve.
Në lidhje me performancën e Romës, Gasperini hodhi poshtë idenë se skuadra nuk ka fituar ndeshje të mëdha në Serie A. "Nuk është se ne nuk kemi fituar asnjë. Me skuadrat para nesh kemi barazuar me Milanin dhe Napolin, kemi fituar me Comon dhe Bolognan. Me Juventusin humbëm në fazën e parë. Nesër duhet të mendojmë për interpretimin e ndeshjes, pasi këto sfida janë në ekuilibër dhe vendosen nga detajet", përfundoi ai.