Marrëveshja e Bordit të Paqes u nënshkrua më 22 janar në Davos të Zvicrës. Në atë ditë, Shqipëria e ratifikoi paraprakisht në Kuvendin e saj, ndërsa Kosova jo. Presidentja aso kohe Vjosa Osmani e kishte nënshkruar, pa ia dorëzuar Kuvendit për ratifikim.
Gati tre muaj pas nënshkrimit, marrëveshja ende nuk është paraqitur në Kuvendin e Kosovës. Deputetët e konsiderojnë të rëndësishme, sidomos sepse derivon nga Shtetet e Bashkuara të Amerikës. Bordi i Paqes do të mbikëqyrë rindërtimin e Gazës dhe do të trajtojë konflikte globale.
Nga Lëvizja Vetëvendosje, shefja e grupit parlamentar Arbërie Nagavci deklaroi se komisioni pritet ta shqyrtojë javën e ardhshme. "Besoj që gjatë javës së ardhshme, komisioni do ta shqyrtojë. Sapo të shqyrtohet, do të na vijë në Kuvend dhe do ta trajtojmë", tha ajo. Deputeti Arbër Rexhaj shtoi se partia ende nuk e ka diskutuar dhe do ta vlerësojë atëherë.
Nga LDK, deputeti Ermal Sadiku pret dokumentin këto ditë ose javën e ardhshme, por theksoi se nuk varet prej tyre. Deputetja Emilia Rexhepi vlerësoi se çdo marrëveshje me SHBA është urgjente.
Vjosa Osmani e cilësoi marrëveshjen si historike, duke thënë se forcon sovranitetin dhe pozicionin ndërkombëtar të Kosovës. Me përfundimin e seancave të së premtes, nuk ka konfirmim për datën e seancës plenare të radhës, ku mund të vendoset në rend të ditës.