Mesfushori i Barcelonës, Gavi, u rikthye në fushë pas më shumë se gjashtë muajsh mungese për shkak të një lëndimi, duke sjellë emocione të mëdha te tifozët Blaugrana.
Futbollisti spanjoll përshkroi periudhën e rikuperimit si shumë të vështirë. "Ishte shumë e vështirë, shumë më e komplikuar se herën e fundit. Kam vuajtur shumë dhe procesi i përditshëm ka qenë i dhimbshëm. Ajo që po ndiej tani është diçka unike dhe jam vërtet shumë i lumtur", tha ai.
Gavi shprehu mirënjohje të madhe ndaj trajnerit Hansi Flick për mbështetjen gjatë kësaj periudhe. "Ky rikuperim i ngjan atij të mëparshmit dhe Flick ka qenë gjithmonë pranë meje si një baba. Ai më ka ndihmuar gjithmonë dhe më ka dhënë besim. E kam ndier këtë dhe jam shumë i lumtur me të. Shpresoj të qëndrojë për një kohë të gjatë."
Pavarësisht mungesës së gjatë, mesfushori spanjoll u shpreh se karakteri dhe stili i lojës së tij mbeten të pandryshuara. "Do të jem gjithmonë i njëjti, jam kështu që kur jam lindur. Kjo është mënyra ime për të konkurruar: kam dhënë gjithmonë gjithçka dhe do të vazhdoj ta bëj për gjithë jetën."
Tashmë Gavi po mendon për sfidat e ardhshme të Barcelonës. "Na presin kundërshtarë të vështirë, por tani duhet të përqendrohemi te ndeshja ndaj Newcastle United në shtëpi."