Guvernatori i Kalifornisë, Gavin Newsom, ka publikuar një video-mesazh pesëminutësh në platformën X, përmes së cilës ka denoncuar ato që ai i cilëson si hetime me motive politike të udhëhequra nga administrata e Presidentit Donald Trump. Sipas demokratit 58-vjeçar, zyrtarët federalë kanë kontaktuar ditët e fundit familjarë, miq dhe ish-bashkëpunëtorë të tij për të kërkuar dokumente të vjetra.
Newsom u shpreh se këto veprime nuk vijnë si pasojë e zbulimit të ndonjë krimi, por si një përpjekje e qëllimshme për të gjetur shkaqe ligjore për ta ndjekur atë. Guvernatori i kërkoi publikisht Presidentit Trump që të mos përfshijë familjen e tij, veçanërisht bashkëshorten Jennifer Siebel Newsom, në përplasjet e tyre politike.
Raportime nga New York Times konfirmojnë se aktualisht po zhvillohen disa hetime ndaj guvernatorit, ku një prej tyre përqendrohet te financat e bashkëshortes së tij. Deri në këto momente, as Shtëpia e Bardhë dhe as Departamenti i Drejtësisë i SHBA-së nuk kanë dhënë ndonjë koment zyrtar në lidhje me këto akuza.
Ky zhvillim shton tensionet midis dy rivalëve politikë, të cilët shpesh janë përfshirë në përplasje të hapura publike. Vlen të përmendet se qershorin e kaluar, Presidenti Trump kishte shprehur publikisht mbështetje për një arrestim të mundshëm të Newsom-it, me pretendimin se guvernatori kishte penguar autoritetet e imigracionit në Kaliforni.