Gazetari Elton Tozaj ka denoncuar në polici gjetjen e një bidoni me benzinë dhe një sasie lënde djegëse të përhapur në tokë pranë derës së banesës së tij. Ngjarja ka ndodhur mëngjesin e 29 janarit 2026, rreth orës 04:30, në një pallat në rrugën "Haxhi Deliu" në Tiranë.
Sipas deklaratave të tij në komisariat, gazetari pretendon se veprimi është bërë si kërcënim nga persona të dyshuar të lidhur me paligjshmëri, të cilët ai i ka denoncuar publikisht me emra. Në rrjetet sociale, Tozaj ka publikuar pamje nga kamerat e sigurisë së pallatit, ku shfaqet një person me një bidon 6 litra benzinë.
Policia e Tiranës ka konstatuar në vendngjarje një bidon me lëndë të dyshuar djegëse dhe sasinë e përhapur në tokë. "Më datë 29.01.2026, rreth orës 04:30, në rrugën "Haxhi Deliu", në një pallat, pranë derës së banesës së shtetasit E. T., është konstatuar një bidon me lëndë të dyshuar djegëse (benzinë) dhe një sasi e kësaj lënde e përhapur në tokë. Grupi hetimor vijon punën për zbardhjen e rrethanave të rastit. Materialet procedurale iu referuan Prokurorisë së Tiranës, për veprime të mëtejshme", thuhet në njoftimin zyrtar të policisë.
Kujtohet se më 26 dhjetor 2025, gazetari Tozaj u dhunua në autostradën Tiranë-Durrës. Familjarët e tij, përmes një reagimi në rrjetet sociale, bënë të ditur se personat e dhunimit ishin identifikuar, ndërsa gazetari rrezikonte të humbte shikimin. Ata përmendën një lidhje të mundshme me një zonjë të showbizit në zonën Rruga Ura – Patok – Kodra e Diellit, pa dhënë emër.