Eksperti i teknologjisë së informacionit, Gent Progni, ka publikuar pamje filmike nga incidenti i ndodhur në orët e para të mëngjesit të datës 27 korrik, gjatë protestës së zhvilluar para godinës së Parlamentit. Në materialin e bërë publik në rrjetet sociale, shfaqet momenti kur një person, i cili sipas Prognit është punonjës i policisë, e kërcënon atë duke përdorur një thikë.
Në pamje dallohet ndërhyrja e një grupi protestuesish, të cilët largojnë personin që dyshohet se ka tentuar të godasë aktivistin. Në një intervistë për News24, Progni deklaroi se e ka identifikuar agresorin si Edison Duda, i cili sipas tij, ka shërbyer më parë në forcën e posaçme Shqiponja dhe aktualisht është pjesë e forcave operacionale në Drejtorinë e Përgjithshme të Policisë.
Progni e ka cilësuar ngjarjen si një tentativë të paramenduar për ta dëmtuar atë, duke pretenduar se po bëhen përpjekje për të fshirë regjistrimet nga kamerat e bizneseve në afërsi të vendngjarjes. Aktivisti ka njoftuar se ka bërë kallëzim pranë Komisariatit Nr. 1 dhe në Agjencinë e Mbikëqyrjes Policore (AMP) për të denoncuar kërcënimin me jetë. Në dëshminë e tij, ai shtoi se pranë AMP-së hasi vështirësi fillestare për regjistrimin e kallëzimit, por kjo u mundësua pas reagimit të tij mediatik.
Sipas aktivistit, ngjarja ndërlidhet me tentativa për të penguar protestat që po mbahen në vend prej rreth dy muajsh. Nga ana e tyre, autoritetet përkatëse pritet të vijojnë verifikimet për zbardhjen e rrethanave të këtij incidenti. Përkundër kësaj ngjarjeje, Progni konfirmoi se do të vijojë angazhimin e tij në protestat e vazhdueshme.