Donika Gërvalla, zëvendëskryeministre dhe ministre e Drejtësisë e Kosovës, ka kritikuar kryeministrin e Shqipërisë, Edi Rama, për një editorial të përbashkët me presidentin e Serbisë, Aleksandar Vuçiq, të publikuar në gazetën gjermane Frankfurter Allgemeine Zeitung më 16 mars 2026.
Gërvalla tha se ky artikull krijon përshtypjen se Rama del në mbështetje të Vuçiqit sa herë që ky i fundit gjendet nën presion nga Bashkimi Evropian. «Nga ana e kryeministrit Rama, i cili i tejkalon edhe ato kur kemi mbyllur njërin sy në të kaluarën, është artikulli i fundit i publikuar së bashku me Vuçiqin në gazetën prestigjioze gjermane. Unë mendoj se qytetarët e Kosovës nuk kanë për t’ia falur atë artikull kryeministrit Rama. Sepse krijohet përshtypja herë pas herë që gjithmonë atëherë kur Vuçiqin BE-ja e mbështet me shpatulla për muri, del Edi Rama dhe e nxjerr nga ajo situatë», deklaroi ajo në RTK.
Ajo theksoi se Shqipëria nuk duhet të ketë alternativa me Serbinë që nuk kalojnë nëpër Kosovë. «Rruga nga Tirana nëpër Beograd qon nëpër Prishtinë, edhe gjeografikisht, edhe ekonomikisht, edhe në çdo aspekt. Kështu, secili kryeministër apo president shqiptar që e harron këtë, afatgjatë ka për të bërë gabime të mëdha që do ta dëmtojnë kombin tonë më shumë», shtoi Gërvalla.
Në këtë editorial, Rama dhe Vuçiq propozojnë që Shqipëria dhe Serbia të bëhen pjesë e Bashkimit Evropian edhe pa të drejta vetoje, pa komisionerë shtesë dhe pa ndryshime në strukturat vendimmarrëse të unionit.
Përditësime
Gërvalla e identifikoi si problem kryesor të editorialit propozimin për hyrjen e përbashkët të Serbisë dhe Shqipërisë në BE, pa përmendur pozicionin e Serbisë ndaj Perëndimit, Rusias, Kinës, Venezuelës dhe Iranit.
Gërvalla sqaroi se problemi kryesor nuk është artikulli i përbashkët, por propozimi për hyrjen e përbashkët të Serbisë dhe Shqipërisë në BE.
Sipas saj, propozimi nuk përmend fare pozicionin e Serbisë ndaj Perëndimit, Rusias, Kinës, Venezuelës, Iranit dhe forcave botërore që bien ndesh me orientimet tona për BE dhe NATO.