Ministrja në detyrë e Punëve të Jashtme dhe Diasporës, Donika Gërvalla, ka komentuar deklaratën e kandidatit për deputet nga Lëvizja Vetëvendosje, Fatos Geci, lidhur me të akuzuarit që gjykohen në Hagë.
Gërvalla foli në emisionin “Këndi i debatit” në Tëvë1. Ajo u pyet për deklaratën që Geci kishte bërë në një seancë të Kuvendit të Kosovës, në ditën kur u shpall vendimi për rastin e Liridona Ademaj.
Në atë seancë, gjatë debatit për Partinë Demokratike të Kosovës, Geci kishte thënë se edhe personat në Hagë duhet të marrin “vendim të njëjtë”, duke iu referuar dënimit me burgim të përjetshëm të Naim Murselit.
Gërvalla tha se e respekton atë që ka thënë Geci dhe e lidhi qëndrimin me historinë e familjes së tij. Ajo theksoi se familja Geci nga Llausha ka një histori të dhimbshme të pasluftës dhe gjatë luftës. Gërvalla shtoi se ajo pjesë e historisë së Kosovës përfaqëson sakrificën e disa familjeve të mëdha dhe se Geci është një nga zërat e ndryshëm në listën e Lëvizjes Vetëvendosje.