Polícia e Kosovës ka bërë të ditur se personi me inicialet M.S., i lindur në vitin 1990, është gjetur i gjallë në zonën e Deçanit.
Familjarët e kishin raportuar zhdukjen e tij disa javë më parë në Stacionin Policor të Leposaviqit. Sipas tyre, personi kishte pasur herë pas here probleme psikike dhe në kontaktin e fundit kishte qenë në Serbi, ku kishte deklaruar se do të kthehej në Kosovë.
Hetimet treguan se ai kishte hyrë në Kosovë më 28 prill 2026 dhe po atë ditë kishte qëndruar në Manastirin e Deçanit, para se të largohej në drejtim të panjohur. Policia kishte njoftuar menjëherë të gjitha stacionet dhe pikat kufitare.
Më 17 maj 2026, rreth orës 10:00, njësitë patrulluese e gjetën personin në zonën e Deçanit. Familjarët u njoftuan dhe gjendja e tij shëndetësore u përshkrua si stabile.