Policia e Kosovës ka gjetur sërish armatim luftarak në dy lokacione në komunën e Zubin Potokut, mes tyre granata dore dhe pajisje të tjera ushtarake. Ky zbulim ndodhi vetëm dy ditë pas gjetjes së një sasie të madhe armatimi në të njëjtën zonë.
Ministri i Punëve të Brendshme, Xhelal Sveçla, reagoi me një postim në rrjetet sociale, ku shkroi: «Beteja kundër çdo celule terroriste nuk ndalet».
Në deklaratën e tij, ai theksoi: «Si dje, edhe sot. Sërish, në dy lokacione në komunën e Zubin Potokut u gjet armatim, granata dore dhe pajisje të tjera ushtarake. Nga kushtetutshmëria cep më cep, te kontrolli pëllëmbë për pëllëmbë. Nuk do të ndalemi deri në çrrënjosjen totale të secilit element kriminal».
Sveçla nënvizoi se po kryhet një kontroll i imtë në zonë për të siguruar sigurinë publike.