Trupi i pajetë i 30-vjeçarit Jurgen Karaj nga fshati Fullqet i Klosit u gjet pas 29 ditësh zhdukje. Ngjarja ndodhi në fshatin Darsë të Klosit, ku makina në të cilën ndodheshin Jurgen Karaj dhe shoku i tij Andi Losha përfundoi në përroi pas aksidentit.
Trupi u gjet 30 kilometra larg vendit të aksidentit nga polumbarët shqiptarë dhe kosovarë. Vëllai i të ndjerit, Endri Karaj, në një deklaratë për gazetarin Enver Doçi të News24, shprehu mirënjohje ndaj të gjithëve që kontribuan në operacion.
"Dua të falënderoj të gjithë ata që ndihmuan në gjetjen e vëllait tim. Falënderoj forcat e Kosovës dhe ato të Shqipërisë që na ndihmuan", tha ai.
Më parë, kur vëllai ishte ende i zhdukur, Endri Karaj kishte bërë apel publik për ndihmë: "Kërkoj të më gjejnë vëllanë e të ma sjellin në shtëpi, ngjarjen e zbardhë policia, dua nga shteti të më gjejë vëllanë të ma sjellë në shtëpi. Ta varros ta di ku e kam. Kemi kërkuar, por deri tani nuk ka pasur asnjë rezultat. Është 9 ditë sot që nuk kemi asnjë shenjë prej tij. Nuk dihet fati i tij. I bëj thirrje kryeministrit që të kemi më shumë forca për ta kërkuar."