Gjermania po përballet me pasoja të rënda nga valët e njëpasnjëshme të të nxehtit gjatë këtij viti. Deri më 19 korrik, janë regjistruar rreth 9 800 vdekje të lidhura me temperaturat ekstreme, sipas të dhënave nga Instituti Kombëtar i Shëndetit Publik, Robert Koch (RKI). Ky numër tejkalon shifrat e çdo viti tjetër që nga viti 2016, duke kaluar edhe rekordin e vitit 2018, kur u shënuan rreth 8 900 vdekje.
Sipas RKI-së, pjesa më e madhe e viktimave u regjistrua gjatë gjysmës së dytë të muajit qershor, periudhë gjatë së cilës temperaturat në shumë rajone të vendit arritën në 40 gradë Celsius. Ndërkohë, vetëm gjatë javës nga 13 deri më 19 korrik, u raportuan rreth 1 900 vdekje, periudhë gjatë së cilës temperatura mesatare javore ishte 20,9 gradë Celsius.
Në lidhje me demografinë e viktimave, instituti raportoi se 7 880 persona i përkisnin grupmoshës 75 vjeç e lart. Mes viktimave të këtij viti, 5 420 ishin mbi 85 vjeç, ndërsa 630 ishin nën moshën 65 vjeç. Gjithashtu, u vërejt një numër më i lartë vdekjesh tek gratë krahasuar me burrat, fakt që ekspertët e lidhin me përqindjen më të lartë të grave në popullsinë e moshuar.
Ekspertët e shëndetit publik theksojnë se nxehtësia ekstreme rrallë është shkaku i vetëm i vdekjes. Në shumicën e rasteve, temperaturat e larta përkeqësojnë sëmundjet ekzistuese, si ato kardiovaskulare, të mushkërive dhe të veshkave. Analizat e kryera në bashkëpunim me 52 stacione meteorologjike tregojnë se javët me temperaturë mesatare mbi 20 gradë Celsius sjellin një rritje të ndjeshme të vdekshmërisë.
Kjo situatë ka nxitur debate në Bundestag mbi nevojën për masa më të forta mbrojtëse. Opozita ka kërkuar shtimin e investimeve për pajisjen e spitaleve, shtëpive të kujdesit për të moshuarit dhe kopshteve me sisteme efikase ftohjeje, duke qenë se shumë institucione ende nuk janë të përgatitura për valët e të nxehtit që pritet të vijojnë.
Përditësime
Nxehtësia ekstreme, që ka shkaktuar rreth 10 mijë vdekje në Gjermani, po dëmton tashmë edhe infrastrukturën e transportit. Nivelet e ujit në lumin Rajn po bien me shpejtësi, ku matësi në pikën kyçe të Kaub po i afrohet nivelit kritik prej 25 centimetrash, rekordit negativ të vitit 2018. Kjo rënie po kufizon lundrimin e anijeve tregtare dhe po rrit rrezikun e ndërprerjeve në zinxhirët e furnizimit.
Sipas të dhënave nga Instituti Robert Koch (RKI), numri i vdekjeve të lidhura me të nxehtin ekstrem në Gjermani u rrit nga 7 900 më 12 korrik në 9 800 deri më 19 korrik. Statistikat tregojnë se viktimat përfshijnë: