Pas rritjes së fluksit të migrimit të parregullt në enklavën spanjolle të Ceutës, disa shtete evropiane kanë ndërmarrë masa të menjëhershme për të forcuar sigurinë në kufijtë e tyre. Ministri i Brendshëm gjerman, Alexander Dobrindt, njoftoi se Gjermania do të vazhdojë të mbajë kontrollet e brendshme kufitare përtej muajit shtator. Sipas tij, situata në Ceuta konfirmon paqëndrueshmërinë e migrimit të paligjshëm, duke e bërë të domosdoshme mbajtjen e kontrolleve fleksibile. Kjo masë, e cila ka qenë në fuqi që nga 16 shtatori 2024, është zgjatur tashmë tri herë.
Në të njëjtën kohë, kryeministri i Portugalisë, Luis Montenegro, ka urdhëruar rritjen e kontrolleve në kufijtë tokësorë dhe detarë, veçanërisht në jug të vendit. Montenegro theksoi se ekzistojnë arsye të forta për të shtuar praninë e forcave të rendit, në bashkëpunim me autoritetet spanjolle. Megjithatë, ai sqaroi se nuk e konsideron të nevojshme pezullimin e rregullave të zonës Shengen, duke besuar në mekanizmat ekzistues për menaxhimin e situatës. Ndërkohë, partia opozitare Chega ka kërkuar zyrtarisht rikthimin e kontrolleve në kufirin tokësor mes Portugalisë dhe Spanjës.
Kryeministri spanjoll, Pedro Sanchez, konfirmoi se qeveria spanjolle po angazhon të gjitha burimet e mundshme për t’iu përgjigjur krizës. Ndërsa vlerësimet për numrin e personave që hynë në enklavë variojnë nga 49 mijë sipas agjencisë EFE deri në 60 mijë sipas burimeve të tjera, pjesa më e madhe e tyre kanë nisur të kthehen në Marok nga e njëjta pikë kufitare.