Qeveria gjermane ka planifikuar mbylljen e kampit të saj ushtarak pranë aeroportit të Erbilit në Irakun verior, duke tërhequr shumicën e trupave të dislokuara deri në fund të muajit shtator. Lajmi u bë i ditur fillimisht nga gazeta "Der Spiegel" dhe u konfirmua nga Ministria e Mbrojtjes.
Zëdhënësja e Ministrisë së Mbrojtjes, Christiane Noack, njoftoi se komisionet parlamentare janë informuar për vendimin. Ajo theksoi se procesi do të jetë i bazuar në një planifikim të detajuar, në koordinim me partnerët ndërkombëtarë, dhe nuk do të jetë një tërheqje e nxituar.
Baza është përballur me kërcënime të përsëritura gjatë muajve të fundit, për shkak të përshkallëzimit të tensioneve pas sulmeve të SHBA-së dhe Izraelit ndaj Iranit. Ndonëse forcat gjermane nuk kanë qenë shënjestër e drejtpërdrejtë e sulmeve iraniane me raketa dhe dronë, afërsia me njësitë amerikane i ka detyruar ushtarët të strehohen shpesh në bunkerë për arsye sigurie.
Christiane Noack nuk dha detaje të mëtejshme mbi afatet e sakta apo logjistikën e zhvendosjes, duke përmendur nevojën për ruajtjen e sigurisë së trupave. Pas mbylljes së kampit, një grup i vogël këshilltarësh ushtarakë do të mbetet i dislokuar në rajon.