Gjermania rikonfirmoi mbështetjen për anëtarësimin e vendeve të Ballkanit Perëndimor në Bashkimin Evropian dhe për integrimin evropian të Kosovës, pas Samitit të Procesit të Berlinit, të mbajtur një ditë më parë në Sveti Stefan të Malit të Zi. Ambasada gjermane në Kosovë shpërndau deklaratën e kancelarit Friedrich Merz, i cili tha: “BE-ja duhet të zgjerohet”.
Në postimin e ambasadës thuhet se Gjermania mbetet e përkushtuar ndaj mbështetjes së integrimit evropian të Kosovës. Aty rikonfirmohet gjithashtu mbështetja gjermane për anëtarësimin e vendeve të Ballkanit Perëndimor në BE.
Ambasada renditi përfitimet që, sipas saj, bashkëpunimi rajonal po sjell për qytetarët:
- Tregti më të lehtë;
- Njohje të kualifikimeve profesionale;
- Më shumë mundësi për të rinjtë.
Në të njëjtin postim, Gjermania falënderoi Malin e Zi për kryesimin e Procesit të Berlinit dhe për programin vjetor, të cilin e cilësoi si më gjithëpërfshirësin deri më tani. Ajo i uroi sukses Austrisë në kryesimin e ardhshëm, me fokus te të rinjtë, pajtimi dhe bashkëpunimi rajonal.