Qeveria gjermane po përgatitet për një pjesëmarrje të mundshme të forcave të saj të armatosura në një mision për mbrojtjen e anijeve në Ngushticën e Hormuzit, një prej korridoreve më strategjike për transportin global të energjisë.
Sipas revistës gjermane Der Spiegel, Ministria e Jashtme dhe Ministria e Mbrojtjes kanë hartuar një draft-mandat për Bundestagun, i cili mund të miratohet nga kabineti qeveritar në një afat të shkurtër. Megjithatë, kancelari Friedrich Merz deklaroi se ende nuk është marrë një vendim përfundimtar. Pas samitit të G7 në Francë, ai theksoi se baza ligjore për çdo angazhim të mundshëm ushtarak mbetet ende për t’u sqaruar.
Ngushtica e Hormuzit ka qenë në qendër të vëmendjes për shkak të tensioneve mes SHBA-së dhe Iranit. Ndërkohë, Franca dhe Mbretëria e Bashkuar po punojnë për një mision që synon garantimin e lirisë së lundrimit dhe mbështetjen e operacioneve të pastrimit të minave në rajon.
Berlini ka shprehur gatishmërinë për t’iu bashkuar këtij operacioni, në përputhje me kuadrin ligjor kombëtar. Sipas Ministrisë gjermane të Mbrojtjes, njësitë detare janë tashmë në gatishmëri: anija minahedhëse Fulda dhe anija e furnizimit Mosel, të vendosura aktualisht në Mesdheun lindor, mund të zhvendosen në zonën e operacioneve brenda pak ditësh.
Përditësime
Kancelari Friedrich Merz përshëndeti marrëveshjen SHBA-Iran dhe armëpushimin rajonal. Në kuadër të zhvillimeve për sigurinë në Ngushticën e Hormuzit, anijet gjermane 'Fulda' dhe 'Mosel' kanë kaluar Kanalin e Suezit drejt Xhibutit. Ministri i Mbrojtjes Boris Pistorius sqaroi se dislokimi nuk kërkon mandat nga Bundestagu, ndërsa Kryeministri i Luksemburgut, Luc Frieden, i vlerësoi këto lëvizje si kyçe për stabilitetin e rajonit.