Ardian Gjini, nënkryetar i Aleancës për Ardhmërinë e Kosovës (AAK), deklaroi në emisionin Debat Plus se partia e tij nuk do të kishte marrë pjesë në takim me kryeministrin Albin Kurti, edhe nëse do të ishte ftuar.
Gjini theksoi se AAK kishte qëndrim të qartë për të mos ndihmuar në asnjë variant që do t’i mundësonte Kurtit vazhdimin e qeverisjes. Sipas tij, Kurti është "person tepër destruktiv" dhe përfaqëson një koncept që po e "shkërmoq Kosovën".
"Kemi pasur qëndrim mos të shkojmë edhe nëse na fton. Ne nuk kemi dashur në asnjë mënyrë ta ndihmojmë në çfarëdo varianti që Albin Kurti të vazhdojë qeverisjen, për shkak të bindjes sonë më të madhe se të tjerëve se ai është person tepër destruktiv dhe koncept që po e shkërmoq Kosovën", tha Gjini.
Sa i përket takimit të kryetarit të AAK-së, Ramush Haradinaj, me presidenten Vjosa Osmani, Gjini sqaroi se në atë takim nuk u kërkuan vota për zgjedhjen e presidentit dhe se kjo çështje nuk u diskutua.
Ai shtoi se Kurti nuk e ka pasur për qëllim zgjedhjen e presidentit në këtë fazë. Kosova, sipas Gjinit, po rrëshqet drejt degradimit institucional dhe krize të vazhdueshme politike, ku "fajtori kryesor i kësaj krize është absolutisht Albin Kurti".
"Zoti Kurti fare nuk e ka pasur për qëllim zgjedhjen e presidentit në këtë fazë. Më brengos që po rrëshqasim në një situatë ku vetë ideja e politikës dhe shërbimit ndaj vendit po shkatërrohet. Ka degradim total institucional dhe krizë të vazhdueshme të prodhuara nga zoti Kurti", deklaroi tutje Gjini.