Gjykata e Posaçme kundër Korrupsionit dhe Krimit të Organizuar ka refuzuar kalimin për gjykim të dosjes penale ndaj ish-kryebashkiakut të Kavajës, Elvis Roshi. Vendimi u komunikua në një seancë paraprake të zhvilluar me dyer të mbyllura, ku gjyqtarja Rudina Palloj vlerësoi se organi i akuzës duhet të plotësojë hetimet.
Sipas informacioneve, gjykata i kishte dhënë më herët mundësinë SPAK-ut që të rregullonte mënyrën e formulimit të akuzës për shpërdorim detyre, lidhur me tenderë publikë të dyshimtë të zhvilluar gjatë mandatit të Elvis Roshit në krye të Bashkisë Kavajë. Megjithatë, argumentet e paraqitura nuk u vlerësuan si të mjaftueshme për të kaluar çështjen në fazën e gjykimit në themel.
Avokati mbrojtës, Andi Skënderi, gjatë seancës pretendoi se gjetjet e prokurorisë, kohëzgjatja e hetimeve dhe mënyra e finalizimit të akuzës nuk përputhen me afatet procedurale të përcaktuara në Kodin e Procedurës Penale.
Detyrat konkrete që gjykata i ka lënë SPAK-ut për plotësimin e dosjes mbeten të paqarta deri në zbardhjen zyrtare të vendimit. Pas këtij hapi procedural, çështja kthehet në fazën e hetimeve paraprake për t’iu nënshtruar rishikimit nga ana e prokurorëve të çështjes.
Përditësime
Gjykata e Posaçme (GJKKO) ka kthyer për hetime dosjen e ish-kryebashkiakut të Kavajës, Elvis Roshi. Prokuroria e Posaçme (SPAK) po shqyrton dy procedura tenderimi të vitit 2014, ku, sipas auditimit të Kontrollit të Lartë të Shtetit (KLSH), dyshohet për një dëme ekonomik prej 33 milionë lekësh. Një prej këtyre procedurave ka pasur si objekt shërbimin e pastrimit të qytetit.