Gjykata e Posaçme e Shkallës së Parë për Korrupsionin dhe Krimin e Organizuar ka konfirmuar masën e sigurisë "arrest në burg" për shtetasin kolumbian Samir Rosales Rodriguez. Vendimi erdhi pas ekstradimit të tij nga Kolumbia drejt Shqipërisë, me qëllim vuajtjen e dënimit prej 14 vitesh burg të dhënë më herët nga drejtësia shqiptare.
Sipas hetimeve të SPAK, Rodriguez ka pasur një rol kyç si "kimist" në laboratorin e kokainës të zbuluar në Frakull të Fierit në nëntor të vitit 2022. Lënda narkotike, me një sasi prej rreth 480 kilogramësh, ishte fshehur brenda një ngarkese me pleh organik që kishte mbërritur nga Amerika e Jugut përmes Malit të Zi. Rodriguez u dokumentua se kishte marrë kampione nga ngarkesa për të konfirmuar pastërtinë e lëndës narkotike përpara procesit të ekstraktimit.
Pas finalizimit të operacionit policor, shtetasi kolumbian u largua nga Shqipëria, por u lokalizua dhe u arrestua nga autoritetet kolumbiane në shtator të vitit 2025. Në dosjen e laboratorit të Frakullës janë dënuar më parë edhe dhjetë shtetas shqiptarë, përfshirë ish-kryekomunarin e zonës, Viktor Çervanaku, me një total prej 89 vitesh burg.