Gjykata e Posaçme Antikorrupsion ka refuzuar kërkesën e ish-drejtorit të Autoritetit Rrugor Shqiptar, Evis Berberi, për ndryshim të masës së sigurisë. Vendimi u mor nga gjyqtarja Marinela Osmani, e cila nuk pranoi zëvendësimin e arrestit me burg me garanci pasurore.
Berberi ndodhet në paraburgim që prej marsit të vitit 2024. Ai akuzohet nga Prokuroria e Posaçme për korrupsion pasiv, pastrim parash dhe shkelje të barazisë në tendera. Hetimet lidhen me tetë tendera publikë me vlerë totale rreth 15 milionë euro, të cilët dyshohet se janë favorizuar në dobi të kompanisë DAAM shpk, të kontrolluar indirekt nga Berberi.
Në dosje përmendet edhe kompania Net Group në pronësi të Valter Begajt, e përdorur sipas hetuesve për transferim fondesh drejt DAAM. Prokuroria ka kërkuar dënimin e Berberit me 10 vjet burg, që për shkak të procedurës së shkurtuar mund të ulet në 6 vjet e 8 muaj.
Hetimet e nisura pas arrestimit të Berberit kanë çuar në hapjen e dosjeve të tjera, ku janë marrë si të pandehur edhe ish-zëvendëskryeministrja Belinda Balluku dhe kryebashkiaku i Shkodrës Benet Beci, të akuzuar për shkelje të barazisë në tendera.