Gjyqtarja e çështjes, Irena Gjoka, vendosi pafajësinë për Majlinda Bufin, duke argumentuar se gjatë procesit gjyqësor nuk u provua kryerja e veprës penale të "Përdorimit të funksionit publik për veprimtari politike ose zgjedhore". Kryebashkiakja u hetua dhe u gjykua në gjendje të lirë gjatë gjithë procedurave ligjore.
Prokuroria e Posaçme (SPAK) kishte kërkuar dënimin e saj me 1 vit e 6 muaj burg. Për shkak të gjykimit të shkurtuar, dënimi do të reduktohej në 1 vit, me kërkesën që ky dënim të pezullohej dhe të zëvendësohej me shërbim prove për një periudhë dyvjeçare. Nga ana e saj, Majlinda Bufi i ka kundërshtuar akuzat gjatë gjithë procesit, duke u deklaruar e pafajshme dhe duke mohuar ushtrimin e presionit apo ndikimit.
Hetimi ndaj kryebashkiakes kishte nisur pas një denoncimi publik lidhur me pretendimet se ajo i kishte kërkuar një qytetari të mos merrte pjesë në zgjedhjet vendore të 14 majit 2023 dhe të mos përfshihej në aktivitetet e forcave të tjera politike.
Përditësime
Gjykata e Posaçme (GJKKO) zhvilloi procesin me gjykim të shkurtuar, ku trupi gjykues pranoi si prova materiale një USB që përmban tri video dhe dy audio. Vendimi për shpalljen e pafajshme të kryebashkiakes së Roskovecit, Majlinda Bufi, mund të ankimohet në Gjykatën e Apelit brenda 15 ditësh.