Ish-presidenti i Malit të Zi, Milo Gjukanoviq, ka deklaruar se qarqe të fuqishme politike dhe të sigurisë nga Beogradi qëndronin prapa të ashtuquajturës "afera S.Ç.". Qëllimi i tyre ishte destabilizimi i Malit të Zi dhe komprometimi i Kosovës në prag të proceseve të rëndësishme politike në rajon.
Në një intervistë për Televizionin E, Gjukanoviq tha se një nga objektivat kryesore ishte komprometimi i misionit të NATO-s, KFOR, dhe i komandës së tij ushtarake. Për këtë qëllim po përgatiteshin 27 vajza që do t'u afroheshin zyrtarëve të lartë ushtarakë të KFOR-it, ndërsa mes tyre ishte edhe S.Ç..
Sipas Gjukanoviqit, autoritetet malazeze kishin siguruar informacione se vajzat po trajnoheshin në ambientet e stadiumit të klubit Obiliq në Beograd. Ai shtoi se KFOR dhe UNMIK arritën në kohë të merrnin informacionet dhe ta parandalonin aktivitetin.
Gjukanoviq pretendon se prapa këtyre operacioneve qëndronin struktura të sigurisë dhe kundërzbulimit ushtarak serb, të lidhura me politikën e kohës së Slobodan Milosheviq dhe kabinetin e ish-presidentit jugosllav Vojislav Koshtunica. Ai tha se këto qarqe besonin se destabilizimi i Kosovës do të ngadalësonte ose pengonte njohjen ndërkombëtare të saj.