Gjykata e Apelit të Juridiksionit të Përgjithshëm ka vendosur të mbajë në paraburgim shtetasen turke Julide Yazici, pas kërkesës së mbrojtjes për zëvendësimin e masës së sigurisë me “arrest në shtëpi”. Gjatë seancës, trupa gjykuese vlerësoi se ekziston rreziku që 32-vjeçarja të largohet nga territori i Shqipërisë, veçanërisht për shkak të statusit të saj si azilante politike në Francë.
Julide Yazici, e cila punon si mësuese, u arrestua rreth dy javë më parë në aeroportin e Rinasit. Ajo akuzohet nga autoritetet e Ankarasë për “dhënie ndihme logjistike për organizatë terroriste” dhe “pjesëmarrje në organizatë terroriste”. Sipas dosjes së prokurorisë, çështja lidhet me pjesëmarrjen e saj të dyshuar në protesta për të drejtat e kurdëve të zhvilluara në Turqi në vitin 2016. Autoritetet turke pretendojnë se gjatë kontrolleve në një banesë në Stamboll janë gjetur prova që implikojnë të arrestuarën.
Vetë Yazici ka deklaruar para gjykatës se është e persekutuar politikisht për shkak të qëndrimeve të saj kundër presidentit turk Recep Tayyip Erdogan. Ajo dhe avokatët e saj kanë pretenduar se ekstradimi drejt Turqisë do të rrezikonte jetën e saj. Nga ana tjetër, Prokuroria ka argumentuar se procedura e ekstradimit do të varet nga dokumentacioni zyrtar që pritet të mbërrijë nga autoritetet turke.
Ndërkohë, mbrojtja ligjore ka njoftuar se për këtë rast do të vihen në dijeni edhe autoritetet franceze, për shkak të mbrojtjes politike që Yazici gëzon në atë vend.
Përditësime
Gjykata e Apelit e Stambollit ka dënuar me formë të prerë aktivisten Julide Yazici me 4 vjet e 2 muaj heqje lirie. Yazici, e cila ishte studente gjatë protestave të vitit 2016 në Turqi, u arrestua nga autoritetet shqiptare në Aeroportin e Rinasit më 4 gusht. Ky vendim zyrtar shton bazën ligjore mbi të cilën autoritetet turke kanë kërkuar ndalimin e saj.
Gjykata e Apelit la në fuqi masën e sigurisë 'arrest në burg' për aktivisten turke Julide Yazici, duke rrëzuar kërkesën e mbrojtjes për zbutjen e masës. Avokati i 32-vjeçares, Artan Shllaku, kundërshtoi vendimin, por trupi gjykues vlerësoi se ekziston rreziku i largimit të mësueses, për shkak të statusit të saj si azilante në Francë. Prokuroria nënvizoi nevojën e mbajtjes në burg deri në përfundimin e procedurave të ekstradimit. Gjithashtu, u saktësua se arrestimi i shtetases turke në Aeroportin e Rinasit ka ndodhur më 5 gusht, dhe jo më 4 gusht siç u raportua fillimisht.